ಮೌಲ್ಯಗಳ ಪರಿಚಯ

 

ಮೌಲ್ಯಗಳ ಸ್ವರೂಪ ಮತ್ತು ಪ್ರಾಮುಖ್ಯತೆ:

    ಮೌಲ್ಯಗಳು ವ್ಯಕ್ತಿಯ ನಡವಳಿಕೆ, ನಿರ್ಧಾರಗಳು ಮತ್ತು ಜೀವನ ವಿಧಾನವನ್ನು ನಿರ್ಧೇಶಿಸುವ ನೈತಿಕ ಮತ್ತು ಸಾಮಾಜಿಕ ತತ್ವಗಳಾಗಿವೆ.

ಮೌಲ್ಯಗಳ ಸ್ವರೂಪ

1.    ವರ್ತನೆಯ ಮಾರ್ಗದರ್ಶಿ: ಮೌಲ್ಯಗಳು ಯಾವುದು ಸರಿ, ಯಾವುದು ತಪ್ಪು; ಯಾವುದು ಅಪೇಕ್ಷಣೀಯ, ಯಾವುದು ಅನಪೇಕ್ಷಣೀಯ ಎಂಬುದನ್ನು ನಿರ್ಧರಿಸುವ ಮಾನದಂಡಗಳಾಗಿವೆ.

2.    ಸ್ಥಿರತೆ ಮತ್ತು ಬದಲಾವಣೆ: ಇವು ಮೂಲತಃ ದೀರ್ಘಕಾಲಿಕ ಮತ್ತು ಸ್ಥಿರ ಸ್ವಭಾವದವು. ಆದಾಗ್ಯೂ, ಕಾಲ, ಅನುಭವ ಮತ್ತು ಸಮಾಜದ ಪ್ರಗತಿಗೆ ತಕ್ಕಂತೆ ಕೆಲವು ಮೌಲ್ಯಗಳು ವಿಕಸನಗೊಳ್ಳುತ್ತವೆ.

3.    ಆಂತರಿಕ ಗುಣ: ಇವು ಬಾಹ್ಯ ಕಾನೂನಿನಂತೆ ಕೇವಲ ದಂಡನೆಯ ಭಯದಿಂದ ಬರುವುದಿಲ್ಲ; ವ್ಯಕ್ತಿಯ ಮನಸ್ಸು ಮತ್ತು ನಂಬಿಕೆಗಳಲ್ಲಿ ಆಳವಾಗಿ ಬೇರೂರಿರುತ್ತವೆ.

4.    ಸಾರ್ವತ್ರಿಕತೆ ಮತ್ತು ವೈವಿಧ್ಯತೆ: ಸತ್ಯ, ಪ್ರೀತಿ, ಶಾಂತಿ ಮುಂತಾದ ಕೆಲವು ಮೌಲ್ಯಗಳು ಸಾರ್ವತ್ರಿಕವಾಗಿದ್ದರೆ, ಸಂಸ್ಕೃತಿ ಮತ್ತು ಪ್ರದೇಶಕ್ಕೆ ತಕ್ಕಂತೆ ಕೆಲವು ಮೌಲ್ಯಗಳಲ್ಲಿ ವ್ಯತ್ಯಾಸಗಳಿರುತ್ತವೆ.

5.    ಕಲಿಕಾ ಪ್ರಕ್ರಿಯೆ: ಮೌಲ್ಯಗಳು ಹುಟ್ಟಿನಿಂದ ಬರುವುದಿಲ್ಲ; ಕುಟುಂಬ, ಶಿಕ್ಷಣ, ಧರ್ಮ, ಸಂಸ್ಕೃತಿ ಮತ್ತು ಸಮಾಜದ ಮೂಲಕ ಮೈಗೂಡಿಸಿಕೊಳ್ಳಲಾಗುತ್ತದೆ.

ಮೌಲ್ಯಗಳ ಪ್ರಾಮುಖ್ಯತೆ:

1.    ವ್ಯಕ್ತಿ ವಿಕಸನ: ಪ್ರಾಮಾಣಿಕತೆ, ಶಿಸ್ತು ಮತ್ತು ಸಹಾನುಭೂತಿಯಂತಹ ಮೌಲ್ಯಗಳು ವ್ಯಕ್ತಿಗೆ ಗೌರವ ತಂದುಕೊಟ್ಟು, ಉತ್ತಮ ಚಾರಿತ್ರ್ಯವನ್ನು ರೂಪಿಸುತ್ತವೆ.

2.    ನಿರ್ಧಾರ ಕೈಗೊಳ್ಳುವಲ್ಲಿ ನೆರವು: ಜೀವನದ ಸಂದಿಗ್ಧ ಪರಿಸ್ಥಿತಿಗಳಲ್ಲಿ ಸರಿಯಾದ ನಿರ್ಧಾರವನ್ನು ಧೈರ್ಯವಾಗಿ ತೆಗೆದುಕೊ‍ಳ್ಳಲು ಮೌಲ್ಯಗಳು ದಿಕ್ಸೂಚಿಯಾಗಿ ಕಾರ್ಯನಿರ್ವಹಿಸುತ್ತವೆ.

3.    ಸಾಮಾಜಿಕ ಸಾಮರಸ್ಯ: ಸಹಿಷ್ಣುತೆ, ಸಮಾನತೆ ಮತ್ತು ಪರಸ್ಪರ ಗೌರವದ ಮೌಲ್ಯಗಳು ಸಮಾಜದಲ್ಲಿ ಶಾಂತಿ ಮತ್ತು ಒಗ್ಗಟ್ಟನ್ನು ಕಾಪಾಡುತ್ತವೆ.

4.    ಜವಾಬ್ದಾರಿಯುತ ನಾಗರೀಕರ ನಿರ್ಮಾಣ: ಕರ್ತವ್ಯ ಪ್ರಜ್ಞೆ ಮತ್ತು ದೇಶಪ್ರೇಮದ ಮೌಲ್ಯಗಳು ವ್ಯಕ್ತಿಯನ್ನು ಸಮಾಜದ ಕಲ್ಯಾಣಕ್ಕೆ ಶ್ರಮಿಸುವ ಜವಾಬ್ದಾರಿಯುತ ನಾಗರೀಕನನ್ನಾಗಿ ಮಾಡುತ್ತವೆ.

5.    ಸಂಘರ್ಷಗಳ ನಿವಾರಣೆ: ಅಹಿಂಸೆ ಮತ್ತು ನ್ಯಾಯದ ತತ್ವಗಳು ವೈಯಕ್ತಿಕ ಹಾಗೂ ಸಮಾಜಿಕ ಮಟ್ಟದ ಭಿನ್ನಾಭಿಪ್ರಾಯಗಳನ್ನು ಮಾತುಕತೆಯ ಮೂಲಕ ಪರಿಹರಿಸಲು ನೆರವಾಗುತ್ತವೆ.

ಮೌಲ್ಯಗಳು ಕೇವಲ ನಿಯಮವಲ್ಲ; ಅವು ವ್ಯಕ್ತಿಯ ಮಾನಸಿಕ ನೆಮ್ಮದಿಗೆ ಮತ್ತು ಸುಸ್ಥಿರ ಸಮಾಜದ ನಿರ್ಮಾಣಕ್ಕೆ ಅಗತ್ಯವಾದ ಮೂಲಾಧಾರಗಳಾಗಿವೆ.

ಮೌಲ್ಯಗಳ ವರ್ಗೀಕರಣ (Classification of Values)

      ತತ್ವಶಾಸ್ತ್ರ ಮತ್ತು ನೈತಿಕತೆಯಲ್ಲಿ ಮೌಲ್ಯಗಳನ್ನು ಮುಖ್ಯವಾಗಿ ಎರಡು ವಿಧಗಳಾಗಿ ವಿಂಗಡಿಸಲಾಗಿದೆ; ಅಂತರ್ಗತ ಮೌಲ್ಯ ಮತ್ತು ಸಾಧನ ಮೌಲ್ಯ/ಬಾಹ್ಯ ಮೌಲ್ಯ.

1.    ಅಂತರ್ಗತ ಮೌಲ್ಯ: ಯಾವುದೇ ಒಂದು ವಿಷಯ ಅಥವಾ ವಸ್ತುವು ಬೇರೆ ಯಾವುದೇ ಪ್ರಯೋಜನವಿಲ್ಲದಿದ್ದರೂ, ತನ್ನಷ್ಟಕ್ಕೆ ತಾನೇ ಮಹತ್ವ ಹೊಂದಿದ್ದರೆ ಅದನ್ನು ಅಂತರ್ಗತ ಮೌಲ್ಯ ಎಂದು ಕರೆಯಬಹುದು

ಅರ್ಥ: ಒಂದು ವಸ್ತುವು ಬೇರೆ ಯವುದೇ ಉದ್ದೇಶವನ್ನು ಸಾಧಿಸಲು ಸಾಧನವಾಗಿರದೆ, ತಾನೇ ಅಂತಿಮ ಗುರಿಯಾಗಿರುವುದು.

ಉದಾಹರಣೆಗಳು:

·         ಸಂತೋಷ ಮತ್ತು ಶಾಂತಿ: ನಾವು ಸಂತೋಷವಾಗಿರಲು ಬಯಸುತ್ತೇವೆ ಏಕೆಂದರೆ ಸಂತೋಷವೇ ಅಂತಿಮ ಗುರಿ; ಬೇರೆ ಯಾವುದೇ ಲಾಭಕಲ್ಲ.

·         ಪ್ರೀತಿ ಮತ್ತು ಸ್ನೇಹ: ನಿಸ್ವಾರ್ಥ ಪ್ರೀತಿ ತನ್ನಷ್ಟಕ್ಕೆ ತಾನೇ ಅಮೂಲ್ಯವಾದುದು.

·         ಜ್ಞಾನ ಮತ್ತು ಸತ್ಯ: ಸತ್ಯವನ್ನು ಅರಿಯುವುದು ತನ್ನದೇ ಆದ ಗೌರವ ಮತ್ತು ಪಾವಿತ್ರ್ಯವನ್ನು ಹೊಂದಿದೆ.

·         ಜೀವ/ಪ್ರಕೃತಿ: ಪ್ರತಿ ಜೀವಿಯು ಈ ಜಗತ್ತಿನಲ್ಲಿ ಬದುಕುವ ಸ್ವತಂತ್ರ ಹಕ್ಕನ್ನು ಹೊಂದಿದೆ ಎಂಬ ಕಲ್ಪನೆ.

2.    ಸಾಧನ ಮೌಲ್ಯ/ಬಾಹ್ಯಮೌಲ್ಯ: ಯವುದೇ ಒಂದು ವಸ್ತುವು ಮತ್ತೊಂದು ಪ್ರಮುಖ ಗುರಿಯನ್ನು ಅಥವಾ ಪ್ರಯೋಜನವನ್ನು ಸಾಧಿಸಲು ನೆರವಾದಾಗ ಮಾತ್ರ ಅದಕ್ಕೆ ಸಿಗುವ ಮೌಲ್ಯ ಎನ್ನಲಾಗುತ್ತದೆ.

ಅರ್ಥ: ಇದು ತನ್ನಷ್ಟಕ್ಕೆ ತಾನೇ ಮೌಲ್ಯ ಹೊಂದಿಲ್ಲ; ಬದಲಿಗೆ ಮತ್ತೊಂದು ಮೌಲ್ಯಯುತವಾದ ಫಲಿತಾಂಶವನ್ನು ತಲುಪಲು ʼಸಾಧನʼ ವಾಗಿ ಬಳಕೆಯಾಗುತ್ತದೆ.

    ಇದು ಇನ್ನೊಂದರ ಸಾಧನೆಗಾಗಿ ಇರುವ ಮಾಧ್ಯಮ.

ಉದಾಹರಣೆಗಳು:

·         ಹಣ: ಕೇವಲ ಕಾಗದದ ನೋಟುಗಳಿಗೆ ತನ್ನಷ್ಟಕ್ಕೆ ಮೌಲ್ಯವಿರುವುದಿಲ್ಲ. ಆದರೆ ಅವುಗಳ ಮೂಲಕ ನಾವು ಆಹಾರ, ಬಟ್ಟೆ, ಆರೋಗ್ಯ ಮತ್ತು ಸಂತೋಷವನ್ನು ಪಡೆಯಬಹುದು. ಆದ್ದರಿಂದ ಹಣವು ಸಾಧನ ಮೌಲ್ಯ ಹೊಂದಿದೆ್

·         ಔಷಧ: ಕಹಿ ಔಷಧವನ್ನು ಯಾರೂ ಸುಮ್ಮನೆ ಇಷ್ಟಪಟ್ಟು ತಿನ್ನುವುದಿಲ್ಲ; ಆದರೆ ಅದು ರೋಗ ನಿವಾಅರಣೆ ಮಾಡಿ ಆರೋಗ್ಯ ನೀಡುವುದರಿಂದ ಅದಕ್ಕೆ ಮೌಲ್ಯವಿದೆ.

·         ವಾಹನ ಅಥವಾ ಮೊಬೈಲ್ ಪೋನ್:‌ ನಮ್ಮ ಸಂವಹನ ಅಥವಾ ಪ್ರಯಾಣದ ಅನುಕೂಲಕ್ಕಾಗಿ ಇವು ಸಾಧನಗಳಾಗಿವೆ.

ವೈಯಕ್ತಿಕ ಮೌಲ್ಯಗಳು:

        ಒಬ್ಬ ವ್ಯಕ್ತಿಯ ನಡವಳಿಕೆ, ನಿರ್ಧಾರಗಳು ಮತ್ತು ಜೀವನ ವಿಧಾನವನ್ನು ರೂಪಿಸುವ ಮೂಲಭೂತ ತತ್ವಗಳು ಅಥವಾ ನಂಬಿಕೆಗಳು.

     ಪ್ರಮುಖ ವೈಯಕ್ತಿಕ ಮೌಲ್ಯಗಳೆಂದರೆ

ವೈಯಕ್ತಿಕ ಮೌಲ್ಯಗಳು	ವಿವರಣೆ್ / ಪ್ರಮುಖ್ಯತೆ
ಪ್ರಾಮಾಣಿಕತೆ	ಸತ್ಯವನ್ನು ನುಡಿಯುವುದು ಮತ್ತು ಮೋಸ ಮಾಡದಿರುವುದು.
ನಿಷ್ಠೆ / ಪ್ರಾಮಾಣಿಕ ನಡತೆ	ಯಾರೂ ನೋಡದಿದ್ದರೂ ಸರಿಯಾದ ಮಾರ್ಗದಲ್ಲಿ ನಡೆಯುವುದು.
ಗೌರವ	ಎಲ್ಲರ ಭಾವನೆ, ಹಕ್ಕು ಮತ್ತು ಅಭಿಪ್ರಾಯಗಳನ್ನು ಮನ್ನಿಸುವುದು.
ಕರುಣೆ / ಅನುಕಂಪ	ಇತರರ ಕಷ್ಟಕ್ಕೆ ಸ್ಪಂದಿಸುವುದು ಹಾಗೂ ಸಹಾಯ ಮಾಡುವ ಮನೋಭಾವ.
ಜವಾಬ್ದಾರಿ	ತನ್ನ ಕರ್ತವ್ಯ ಮತ್ತು ಕ್ರಿಯೆಗಳ ಹೊಣೆ ಹೊರಲು ಸಿದ್ಧವಿರುವುದು.
ಶಿಸ್ತು	ಗುರಿ ತಲುಪಲು ನಿಯಮಿತ ಅಭ್ಯಾಸ ಮತ್ತು ಸ್ವಯಂ ನಿಯಂತ್ರಣ ಪಾಲಿಸುವುದು.
ಸಹಾನುಭೂತಿ	ಇತರರ ಪರಿಸ್ಥಿತಿಯಲ್ಲಿ ತನ್ನನ್ನು ತಾನು ಇಟ್ಟುಕೊಂಡು ಯೋಚಿಸುವುದು.
ಧೈರ್ಯ / ಸಾಹಸ	ಕಷ್ಟ ಅಥವಾ ಅನಿಶ್ಚಿತ ಸಂದರ್ಭಗಳನ್ನು ಎದುರಿಸುವ ಶಕ್ತಿ.
ಛಲ / ಸತತ ಪರಿಶ್ರಮ	ಸೋಲುಗಳಿಗೆ ಎದೆಗುಂದದೆ ಗುರಿಯತ್ತ ಮುನ್ನಡೆಯುವುದು.
ವಿನಮ್ರತೆ /  ಸೌಜನ್ಯ	ಎಷ್ಠೇ ಸಾಧನೆ ಮಾಡಿದರೂ ಗರ್ವವಿಲ್ಲದೆ ಸರಳವಾಗಿರುವುದು.
ಕೃತಜ್ಞತೆ	ಜೀವನದಲ್ಲಿ ದೊರೆತ ಒಳ್ಳೆಯ ವಿಷಯಗಳು ಮತ್ತು ಸಹಾಯಕ್ಕೆ ಧನ್ಯವಾದ ಭಾವನೆ ಹೊಂದಿರುವುದು.

 

ಸಾಮಾಜಿಕ ಮೌಲ್ಯಗಳು

       ಸಾಮಾಜಿಕ ಮೌಲ್ಯಗಳು ಎಂಬುದು ಸಮಾಜದಲ್ಲಿ ಶಾಂತಿ, ಸಾಮರಸ್ಯ ಮತ್ತು ಸಮತೋಲನವನ್ನು ಕಾಪಾಡಿಕೊಳ್ಳಲು ಜನರು ಅನುಸರಿಸಬೇಕಾದ ನೈತಿಕ ಮತ್ತು ಸಾಂಸ್ಕೃತಿಕ ತತ್ವಗಳಾಗಿವೆ. ವ್ಯಕ್ತಿ ಸಮಾಜದಲ್ಲಿ ಹೇಗೆ ನಡೆದುಕೊಳ್ಳಬೇಕು, ಇತರರೊಂದಿಗೆ ಹೇಗೆ ವರ್ತಿಸಬೇಕು ಎಂಬುದನ್ನು ಇವು ನಿರ್ಧರಿಸುತ್ತವೆ.

ಪ್ರಮುಖ ಸಾಮಾಜಿಕ ಮೌಲ್ಯಗಳು:

1.    ಸಮಾನತೆ: ಜಾತಿ, ಮತ, ಲಿಂಗ, ಬಣ್ಣ ಅಥವಾ ಆರ್ಥಿಕ ಸ್ಥಿತಿಯ ಆಧಾರದ ಮೇಲೆ ಯಾವುದೇ ತಾರತಮ್ಯ ಮಾಡದೆ ಎಲ್ಲರನ್ನು ಸಮಾನವಾಗಿ ಕಾಣುವುದು. ಸಮಾಜದಲ್ಲಿ ಪ್ರತಿಯೊಬ್ಬ ವ್ಯಕ್ತಿಗೂ ಸಮಾನ ಹಕ್ಕುಗಳು ಮತ್ತು ಗೌರವ ದೊರೆಯಬೇಕು ಎಂಬ ಮೌಲ್ಯ.

2.    ಸತ್ಯ ಮತ್ತು ಪ್ರಾಮಾಣಿಕತೆ: ವೈಯಕ್ತಿಕ ಮತ್ತು ಸಾರ್ವಜನಿಕ ಜೀವನದಲ್ಲಿ ಸತ್ಯನಿಷ್ಟೆಯನ್ನು ಪಾಲಿಸುವುದು. ವೃತ್ತಿ, ವ್ಯಾಪಾರ ಹಾಗೂ ಪರಸ್ಪರ ಸಂಬಂಧಗಳಲ್ಲಿ ಪಾರದರ್ಶಕತೆ ಮತ್ತು ನಂಬಿಕೆಯನ್ನು ಕಾಪಾಡುವುದು.

3.    ಗೌರವ ಮತ್ತು ಸಹಿಷ್ಣುತೆ: ಹಿರಿಯರು, ಕಿರಿಯರು ಮತ್ತು ಮಹಿಳೆಯರಿಗೆ ಸೂಕ್ತ ಗೌರವ ನೀಡುವುದು. ಭಿನ್ನ ಧರ್ಮ, ಸಂಸ್ಕೃತಿ ಮತ್ತು ವೈಚಾರಿಕ ಭಿನ್ನಾಭಿಪ್ರಾಯಗಳನ್ನು ಸ್ವೀಕರಿಸಿ, ಸಹಬಾಳ್ವೆಯಿಂದ ಜೀವಿಸುವುದು.

4.    ಕರುಣೆ ಮತ್ತು ಪರಾನುಭೂತಿ: ಸಂಕಷ್ಟದಲ್ಲಿರುವವರು, ಬಡವರು, ಅಸಹಾಯಕರು ಹಾಗೂ ಪ್ರಾಣಿಗಳ ಬಗ್ಗೆ ದಯೆ ಮತ್ತು ಕರುಣೆ ತೋರುವುದು. ಇತರರ ನೋವನ್ನು ತನ್ನದೇ ನೋವೆಂದು ತಿಳಿದು ನೆರವಾಗುವುದು.

5.    ಸಹಕಾರ ಮತ್ತು ಒಗ್ಗಟ್ಟು: ಸಮಾಜದ ಪ್ರಗತಿ ಮತ್ತು ಹಿತದೃಷ್ಟಿಯಿಂದ ಪರಸ್ಪರ ಕೈಜೋಡಿಸಿ ಕೆಲಸ ಮಾಡುವುದು. “ಒಗ್ಗಟ್ಟಿನಲ್ಲಿ ಬಲವಿದೆ” ಎಂಬ ತತ್ವದಂತೆ ಕಷ್ಟದ ಸಮಯದಲ್ಲಿ ಸಮುದಾಯದ ಜೊತೆಗೆ ನಿಲ್ಲುವುದು.

6.    ನ್ಯಾಯ ಮತ್ತು ಕರ್ತವ್ಯ ಪ್ರಜ್ಞೆ: ಪ್ರತಿಯೊಬ್ಬರಿಗೂ ಸಾಮಾಜಿಕ ಮತ್ತು ಕಾನೂನಾತ್ಮಕ ನ್ಯಾಯ ಸಿಗುವಂತೆ ನಡೆದುಕೊಳ್ಳುವುದು. ಸಮಾಜ ಮತ್ತು ದೇಶದ ಕಡೆಗೆ ತನ್ನ ಜವಾಬ್ದಾರಿಗಳು ಮತ್ತು ಕರ್ತವ್ಯಗಳನ್ನು ಪ್ರಾಮಾಣಿಕವಾಗಿ ಪಾಲಿಸುವುದು.

7.    ಶಾಂತಿ ಮತ್ತು ಅಹಿಂಸೆ: ಹಿಂಸೆ, ಕೋಪ ಮತ್ತು ದ್ವೇಷಗಳನ್ನು ತ್ಯಜಿಸಿ ಶಾಂತಿಯುತವಾಗಿ ಸಮಸ್ಯೆಗಳನ್ನು ಬಗೆಹರಿಸಿಕೊಳ್ಳುವುದು. ಸಮಾಜದಲ್ಲಿ ಸೌಹಾರ್ದಯುತ ವಾತಾವರಣ ನಿರ್ಮಿಸುವುದು.

ಸಾಮಾಜಿಕ ಮೌಲ್ಯಗಳ ಮಹತ್ವ:

1.     ಸಾಮಾಜಿಕ ಸ್ವಾಸ್ಥ್ಯ: ಅಪರಾಧ, ಕಲಹ ಮತ್ತು ಅಶಾಂತಿಯನ್ನು ತಡೆದು ಸುರಕ್ಷಿತ ವಾತಾವರಣ ಸೃಷ್ಠಿಸುತ್ತದೆ.

2.     ವ್ಯಕ್ತಿತ್ವ ವಿಕಸನ: ವ್ಯಕ್ತಿಯಲ್ಲಿ ನೈತಿಕ ಚಿಂತನೆಗಳನ್ನು ಬೆಳೆಸಿ ಉತ್ತಮ ನಾಗರೀಕರನ್ನಾಗಿ ರೂಪಿಸುತ್ತವೆ.

3.     ಸಾಂಸ್ಕೃತಿಕ ಪರಂಪರೆ: ಸಂಸ್ಕೃತಿ, ಕಲೆ ಮತ್ತು ಮಾನವೀಯ ಪರಂಪರೆಯನ್ನು ಮುಂದಿನ ಪೀಳಿಗೆಗೆ ಕೊಂಡೊಯ್ಯಲು ಸಹಾಯ ಮಾಡುತ್ತವೆ.

‌ಕೌಟುಂಬಿಕ ಮೌಲ್ಯಗಳು

       ಕೌಟುಂಬಿಕ ಮೌಲ್ಯಗಳು ಎನ್ನುವುದು ಕುಟುಂಬದಲ್ಲಿ ಶಾಂತಿ, ಪ್ರೀತಿ ಮತ್ತು ಸಾಮರಸ್ಯವನ್ನು ಕಾಪಾಡುವ ಪ್ರಮುಖ ತತ್ವಗಳಾಗಿವೆ. ಕೌಟುಂಬಿಕ ಮೌಲ್ಯಗಳೆಂದರೆ,

·         ಹಿರಿಯರಿಗೆ ಗೌರವ: ತಂದೆ-ತಾಯಿ ಮತ್ತು ಗುರು-ಹಿರಿಯರ ಮಾತಿಗೆ ಬೆಲೆ ನೀಡುವುದು, ಅವರ ಅನುಭವವನ್ನು ಗೌರವಿಸುವುದು ಹಾಗೂ ಅವರ ಆಶಿರ್ವಾದ ಪಡೆಯುವುದು.

·         ಪರಸ್ಪರ ಪ್ರೀತಿ ಮತ್ತು ವಿಶ್ವಾಸ: ಕುಟುಂಬದ ಸದಸ್ಯರ ನಡುವೆ ನಂಬಿಕೆ, ಆಪ್ಯಾಯತೆ ಮತ್ತು ಪ್ರೀತಿಯ ಬಂಧವನ್ನು ಗಟ್ಟಿಗೊಳಿಸುವುದು.

·         ಸಹಬಾಳ್ವೆ ಮತ್ತು ಒಗ್ಗಟ್ಟು: “ಕೂಡಿ ಬಾಳಿದರೆ ಸ್ವರ್ಗ ಸುಖ” ಎಂಬಂತೆ, ಸಂಕಷ್ಟ ಮತ್ತು ಸಂಭ್ರಮ ಎರಡರಲ್ಲೂ ಕುಟುಂಬದವರ ಜೊತೆಯಾಗಿ ನಿಲ್ಲುವುದು.

·         ತ್ಯಾಗ ಮತ್ತು ಹೊಂದಾಣಿಕೆ: ಇತರರ ಸಂತೋಷ ಮತ್ತು ಕುಟುಂಬದ ಹಿತಕ್ಕಾಗಿ ಸ್ವಾರ್ಥವನ್ನು ಬದಿಗಿಟ್ಟು ಹೊಂದಾಣಿಕೆಯಿಂದ ಬದುಕುವುದು.

·         ಸಂಸ್ಕಾರ ಮತ್ತು ಆಚಾರ-ವಿಚಾರ: ಮಕ್ಕಳಿಗೆ ಸತ್ಯ, ಪ್ರಾಮಾಣಿಕತೆ, ಸಂಸ್ಕೃತಿ ಮತ್ತು ಸತ್ಪ್ರಜೆಗಳಾಗುವ ಶಿಕ್ಷಣವನ್ನು ಮನೆಯಿಂದಲೇ ಕಲಿಸುವುದು.

·         ಆತಿಥ್ಯ ಮತ್ತು ಪರಹಿತ: “ಅತಿಥಿ ದೇವೋ ಭವ” ಎಂಬಂತೆ ಮನೆಗೆ ಬಂದವರನ್ನು ಪ್ರೀತಿಯಿಂದ ಉಪಚರಿಸುವುದು ಮತ್ತು ನೆರೆಹೊರೆಯವರೊಂದಿಗೆ ಸೌಹಾರ್ದತೆಯಿಂದ ಇರುವುದು.

ಸಾಂಸ್ಕೃತಿಕ ಮೌಲ್ಯಗಳು

      ಕನ್ನಡ ಸಂಸ್ಕೃತಿಯು ಸಾವಿರಾರು ವರ್ಷಗಳ ಇತಿಹಾಸ, ಸಾಹಿತ್ಯ ಮತ್ತು ಪರಂಪರೆಯಿಂದ ಶ್ರೀಮಂತವಾಗಿದೆ. ಕನ್ನಡಿಗರ ಸಾಂಸ್ಕೃತಿಕ ಮೌಲ್ಯಗಳು ವ್ಯಕ್ತಿತ್ವ ವಿಕಸನ, ಸಮಾಜದ ಹಿತ ಮತ್ತು ನೈತಿಕತೆಯನ್ನು ಎತ್ತಿಹಿಡಿಯುತ್ತವೆ. ಕೆಲವು ಸಾಂಸ್ಕೃತಿಕ ಮೌಲ್ಯಗಳೆಂದರೆ,

·         ʼಕಾಯಕವೇ ಕೈಲಾಸʼ ಮತ್ತು ʼದಾಸೋಹʼ(ಶ್ರಮ ಹಾಗೂ ನಿಸ್ವಾರ್ಥ ಸೇವೆ): 12ನೇ ಶತಮಾನದ ಶರಣ ಚಳುವಳಿ ಮತ್ತು ಬಸವಣ್ಣನವರ ತತ್ವಗಳು ಕನ್ನಡ ಸಂಸ್ಕೃತಿಯ ಮೂಲಾಧಾರ.

ü  ಕಾಯಕವೇ ಕೈಲಾಸ- ಮಾಡುವ ಕೆಲಸವನ್ನು ಶ್ರದ್ದೆ ಹಾಗೂ ಪ್ರಾಮಾಣಿಕತೆಯಿಂದ ಮಾಡುವುದೇ ದೇವರು ಅಥವಾ ಸ್ವರ್ಗಕ್ಕೆ ಸಮಾನ.

ü  ದಾಸೋಹ ಭಾವ: ಕಾಯಕದಿಂದ ಗಳಿಸಿದ ಸಂಪತ್ತನ್ನು ಸಮಾಜದ ಒಳಿತಿಗಾಗಿ ಮತ್ತು ಹಸಿದವರಿಗೆ ಅನ್ನದಾನ/ಜ್ಞಾನದಾನವಾಗಿ ಹಂಚಿಕೊಳ್ಳುವ ನಿಷ್ಕಾಮ ಸೇವಾ ಮನೋಭಾವ.

·         ಸೌಹಾರ್ದ ಮತ್ತು ಸಹಿಷ್ಣುತೆ (ಸರ್ವಧರ್ಮ ಸಮನ್ವಯ):

ü  ಎಲ್ಲಾ ಧರ್ಮ, ಜಾತಿ ಹಾಗೂ ಸಮುದಾಯಗಳನ್ನು ಗೌರವಿಸುವುದು ಮತ್ತು ಒಟ್ಟಾಗಿ ಬದುಕುವುದು.

·         ಅತಿಥಿ ಸತ್ಕಾರ (ಆತಿಥ್ಯ): ಮನೆಗೆ ಬಂದ ಅತಿಥಿಗಳನ್ನು ʼಅತಿಥಿ ದೇವೋಭವʼ ಎಂಬ ಭಾವನೆಯಿಂದ ಪ್ರೀತಿ ಮತ್ತು ಆದರಗಳಿಂದ ಉಪಚರಿಸುವುದು. ಊಟ ಹಾಕುವುದರಲ್ಲಿ ಮತ್ತು ಆತ್ಮೀಯತೆಯಿಂದ ಸ್ವಾಗತಿಸುವುದರಲ್ಲಿ ಮುಂದಿರಬೇಕು.

·         ಹಿರಿಯರಿಗೆ ಗೌರವ ಮತ್ತು ಕುಟುಂಬ ಮೌಲ್ಯಗಳು: ತಂದೆ-ತಾಯಿ ಮತ್ತು ಗುರು-ಹಿರಿಯರ ಮಾತಿಗೆ ಬೆಲೆ ನೀಡುವುದು, ಅವರ ಅನುಭವವನ್ನು ಗೌರವಿಸುವುದು ಹಾಗೂ ಅವರ ಆಶಿರ್ವಾದ ಪಡೆಯುವುದು. ಅವಿಭಕ್ತ ಕುಟುಂಬದ ಸಂಪ್ರದಾಯಗಳು, ಬಂಧು-ಮಿತ್ರರ ನಡುವಿನ ಬಾಂಧವ್ಯ ಮತ್ತು ಕೌಟುಂಬಿಕ ಒಗ್ಗಟ್ಟಿಗೆ ಹೆಚ್ಚಿನ ಪ್ರಾಮುಖ್ಯತೆ.

·         ಭಾಷಾಭಿಮಾನ ಮತ್ತು ನಾಡಪ್ರೇಮ: ನಮ್ಮ ಭಾಷೆ, ನಾಡು ಮತ್ತು ನೆಲ-ಜಲದ ಮೇಲಿನ ಅಚಲ ಪ್ರೀತಿ. ಇತರ ಭಾಷೆಗಳನ್ನು ಗೌರವಿಸುತ್ತಲೇ ತನ್ನ ತಾಯ್ನುಡಿಯನ್ನು ಹೆಮ್ಮೆಯಿಂದ ಪ್ರೀತಿಸುವ ಮತ್ತು ಉಳಿಸಿ ಬೆಳೆಸುವ ಮನೋಭಾವ.

·         ಪ್ರಕೃತಿ ಪೂಜೆ ಮತ್ತು ಪರಿಸರ ಪ್ರಜ್ಞೆ: ಭೂಮಿ ತಾಯಿ, ನದಿಗಳು, ವೃಕ್ಷಗಳು ಹಾಗೂ ಜಾನವಾರುಗಳನ್ನು ಪೂಜಿಸುವ ಪದ್ಧತಿ. ಸಂಕ್ರಾಂತಿ, ನಾಗರಪಂಚಮಿ, ಕಾರಹುಣ್ಣಿಮೆ ಮುಂತಾದ ಹಬ್ಬಗಳು ಕೃಷಿ ಮತ್ತು ಪ್ರಕೃತಿಯೊಂದಿಗಿನ ಅವಿನಾಭಾವ ಸಂಬಂಧವನ್ನು ಬಿಂಬಿಸುತ್ತವೆ.

·         ಸಾಹಿತ್ಯ ಮತ್ತು ಕಲೆಗಳ ಆರಾಧನೆ: ಯಕ್ಷಗಾನ, ಭರತನಾಟ್ಯ, ಬಯಲಾಟ, ಕರ್ನಾಟಕ ಶಾಸ್ರೀಯ ಸಂಗೀತ ಮತ್ತು ಜಾನಪದ ಕಲೆಗಳನ್ನು ಜೀವಂತವಾಗಿರಿಸುವುದು. ವಚನಗಳು, ದಾಸರ ಪದ.

ಆಧ್ಯಾತ್ಮಿಕ ಮೌಲ್ಯಗಳು

         ಆಧ್ಯಾತ್ಮಿಕ ಮೌಲ್ಯಗಳು ವ್ಯಕ್ತಿಯ ಅಂತರಂಗದ ಶುದ್ದಿ, ಮನಃ ಶಾಂತಿ ಮತ್ತು ಸಮಾಜದೊಂದಿಗೆ ಸಾಮರಸ್ಯದಿಂದ ಬದುಕಲು ಮಾರ್ಗದರ್ಶನ ನೀಡುವ ತತ್ವಗಳಾಗಿವೆ.

ಪ್ರಮುಖ ಆಧ್ಯಾತ್ಮಿಕ ಮೌಲ್ಯಗಳು

·         ಶಾಂತಿ: ಅಂತರಂಗದ ನೆಮ್ಮದಿ ಮತ್ತು ಸಮಚಿತ್ತತೆ. ಬಾಹ್ಯ ಪರಿಸ್ಥಿತಿಗಳು ಏನೇ ಇದ್ದರೂ ಮನಸ್ಸನ್ನು ಸ್ಥಿರವಾಗಿಟ್ಟುಕೊಳ್ಳುವುದು.

·         ಸತ್ಯ: ನುಡಿದಂತೆ ನಡೆಯುವುದು ಮತ್ತು ಸತ್ಯ, ನಿಷ್ಠೆ ಜೀವನ ನಡೆಸುವುದು.

·         ಅಹಿಂಸೆ ಮತ್ತು ಕರುಣೆ: ಕಾಯಾ, ವಾಚಾ, ಮನಸಾ ಯಾವುದೇ ಜೀವಿಗೆ ನೋವುಂಟು ಮಾಡದಿರುವುದು ಹಾಗೂ ಎಲ್ಲ ಜೀವಿಗಳಲ್ಲೂ ದಯೆ ಮತ್ತು ಪ್ರೀತಿ ತೋರುವುದು.

·         ಪ್ರೀತಿ ಮತ್ತು ನಿಸ್ವಾರ್ಥತೆ: ಫಲದ ಅಪೇಕ್ಷೆಯಿಲ್ಲದೆ ಇತರರಿಗೆ ಸಹಾಯ ಮಾಡುವುದು ಹಾಗೂ ತ್ಯಾಗ ಮನೋಭಾವ ಹೊಂದಿರುವುದು.

·         ಕೃತಜ್ಞತೆ: ಬದುಕಿನಲ್ಲಿ ಸಿಕ್ಕಿರುವ ಅವಕಾಶಗಳು, ಸಂಬಂಧಗಳು ಮತ್ತು ಪ್ರಕೃತಿಯ ಬಗ್ಗೆ ಸದಾ ಗೌರವ ಮತ್ತು ಧನ್ಯತಾ ಭಾವವನ್ನು ಹೊಂದಿರುವುದು.

·         ತಾಳ್ಮೆ ಮತ್ತು ಸಹನೆ: ಕಷ್ಟದ ಸಂದರ್ಭಗಳಲ್ಲಿ ಧೃತಿಗೆಡದೆ ಸಂಯಮದಿಂದ ವರ್ತಿಸುವುದು.

·         ಸಂತೃಪ್ತಿ: ದುರಾಸೆ ಇಲ್ಲದೆ, ತನಗೆ ಲಭಿಸಿರುವುದರಲ್ಲಿ ಸಂತೋಷವನ್ನು ಕಂಡುಕೊಳ್ಳುವುದು.

·         ಆತ್ಮಸಾಕ್ಷಾತ್ಕಾರ/ ಆತ್ಮಾವಲೋಕನ: ತನ್ನ ನಿಜವಾದ ಸ್ವರೂಪವನ್ನು (ಆತ್ಮವನ್ನು) ಅರಿತುಕೊಳ್ಳುವ ಮತ್ತು ನಿರಂತರ ಸ್ವಯಂ-ಸುಧಾರಣೆಯ ಹಾದಿಯಲ್ಲಿ ಸಾಗುವ ಪ್ರಯತ್ಮ.

ಪ್ರಜಾಪ್ರಭುತ್ವದ ಮೌಲ್ಯಗಳು

      ಪ್ರಜಾಪ್ರಭುತ್ವದ ಮೌಲ್ಯಗಳು ಪ್ರಜೆಗಳ ಹಕ್ಕುಗಳು, ಸಮಾನತೆ ಮತ್ತು ಸ್ವಾತಂತ್ರ್ಯವನ್ನು ರಕ್ಷಿಸುವ ಮೂಲಾಧಾರಗಳಾಗಿವೆ. ಭಾರತದ ಸಂವಿಧಾನದ ಪ್ರಸ್ತಾವನೆಯಲ್ಲೂ ಇವುಗಳಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಗಿದೆ. ಮುಖ್ಯವಾದ ಪ್ರಜಾಪ್ರಭುತ್ವದ ಮೌಲ್ಯಗಳೆಂದರೆ,

·         ಸ್ವಾತಂತ್ರ್ಯ: ಪ್ರತಿಯೊಬ್ಬ ನಾಗರೀಕನಿಗೂ ವಾಕ್‌ ಸ್ವಾತಂತ್ರ್ಯ, ಅಭಿವ್ಯಕ್ತಿ ಸ್ವಾತಂತ್ರ್ಯ, ಧಾರ್ಮಿಕ ಸ್ವಾತಂತ್ರ್ಯ ಮತ್ತು ಸಂಚಾರ ಸ್ವಾತಂತ್ರ್ಯ ಇರುತ್ತದೆ.

·         ಸಮಾನತೆ: ಜಾತಿ, ಮತ, ಲಿಂಗ, ಬಣ್ಣ ಅಥವಾ ಆರ್ಥಿಕ ಹಿನ್ನೆಲೆಯ ಆಧಾರದ ಮೇಲೆ ಯಾವುದೇ ತಾರತಮ್ಯವಿಲ್ಲದೆ ಕಾನೂನಿನ ಮುಂದೆ ಎಲ್ಲರೂ ಸಮಾನರು.

·         ನ್ಯಾಯ: ಪ್ರತಿಯೊಬ್ಬರಿಗೂ ಸಾಮಾಜಿಕ, ಆರ್ಥಿಕ ಮತ್ತು ರಾಜಕೀಯ ನ್ಯಾಯ ದೊರೆಯುವಂತೆ ಮಾಡುವುದು.

·         ಭ್ರಾತೃತ್ವ: ದೇಶದ ಪ್ರಜೆಗಳ ನಡುವೆ ಸಹೋದರತ್ವ ಮತ್ತು ಏಕತೆಯ ಭಾವನೆಯನ್ನು ಬೆಳೇಸುವುದು.

·         ಸಾರ್ವಭೌಮತ್ವ: ದೇಶದ ಆಡಳಿತ ಮತ್ತು ನಿರ್ಧಾರಗಳಲ್ಲಿ ಪ್ರಜೆಗಳೇ ಪರಮೋಚ್ಚ ಶಕ್ತಿ. ಸರ್ಕಾರವು ಜನರಿಂದ, ಜನರಿಗಾಗಿ ಮತ್ತು ಜನರಿಗೋಸ್ಕರ ಇರುತ್ತದೆ.

·         ಸಹಿಷ್ಣುತೆ ಮತ್ತು ಬಹುತ್ವ: ವಿಭಿನ್ನ ಅಭಿಪ್ರಾಯಗಳು, ನಂಬಿಕೆಗಳು ಮತ್ತು ಸಂಸ್ಕೃತಿಗಳನ್ನು ಗೌರವಿಸುವುದು ಮತ್ತು ಒಪ್ಪಿಕೊಳ್ಳುವುದು.

·         ಕಾನೂನಿನ ಆಳ್ವಿಕೆ: ಯಾರೂ ಕಾನೂನಿಗಿಂತ ಮಿಗಿಲಲ್ಲ; ಪ್ರತಿಯೊಬ್ಬರೂ ದೇಶದ ಸಂವಿಧಾನ ಮತ್ತು ಕಾನೂನಿಗೆ ಬದ್ಧರಾಗಿರಬೇಕು.

·         ಪ್ರಜೆಗಳ ಸಹಭಾಗಿತ್ವ: ಮತದಾನದ ಮೂಲಕ ತಮ್ಮ ಪ್ರತಿನಿಧಿಗಳನ್ನು ಆಯ್ಕೆ ಮಾಡಿಕೊಳ್ಳುವುದು ಹಾಗೂ ಸರ್ಕಾರದ ನೀತಿಗಳ ಬಗ್ಗೆ ಧ್ವನಿ ಎತ್ತುವ ಹಕ್ಕು ಹೊಂದಿರುವುದು.

ಸಾಂಸ್ಥಿಕ ಮೌಲ್ಯಗಳು

        ಸಾಂಸ್ಥಿಕ ಮೌಲ್ಯಗಳು ಎಂಬುದು ಕನ್ನಡದಲ್ಲಿ “ಸಂಸ್ಥೆಯ ನೀತಿ-ನಿಯಮಗಳು, ತತ್ವಗಳು ಮತ್ತು ಮೌಲ್ಯಗಳು” ಎಂದರ್ಥ. ಯಾವುದೇ ಒಂದು ಶಿಕ್ಷಣ ಸಂಸ್ಥೆ, ಕಂಪನಿ ಅಥವಾ ಸಂಘಟನೆಯ ಸಂಸ್ಕೃತಿ, ನಡವಳಿಕೆ ಮತ್ತು ನಿರ್ಧಾರಗಳನ್ನು ರೂಪಿಸುವ ಮೂಲಭೂತ ನೈತಿಕ ತತ್ವಗಳನ್ನು ಇದು ಸೂಚಿಸುತ್ತದೆ.

ಪ್ರಮುಖ ಸಾಂಸ್ಥಿಕ ಮೌಲ್ಯಗಳೆಂದರೆ:

·         ಪ್ರಾಮಾಣಿಕತೆ ಮತ್ತು ನಿಷ್ಠೆ: ಎಲ್ಲಾ ಕೆಲಸ-ಕಾರ್ಯಗಳಲ್ಲಿ ನೈತಿಕತೆ, ಸತ್ಯಸಂಧತೆ ಮತ್ತು ನ್ಯಾಯಯುತವಾಗಿ  ನಡ್ದುಕೊಳ್ಳುವುದು.

·         ಪಾರದರ್ಶಕತೆ: ಸಂಸ್ಥೆಯ ನಿರ್ಧಾರಗಳು, ನಿಯಮಗಳು ಮತ್ತು ಆಡಳಿತದಲ್ಲಿ ಸ್ಪಷ್ಟತೆ ಹಾಗೂ ನಂಬಿಕೆಯನ್ನು ಕಾಪಾಡುವುದು.

·         ಜವಾಬ್ದಾರಿ ಮತ್ತು ಹೊಣೆಗಾರಿಕೆ: ತಮಗೆ ವಹಿಸಿದ ಕೆಲಸ, ಗುರಿ ಮತ್ತು ಅವುಗಳ ಫಲಿತಾಂಶಕ್ಕೆ ಸ್ವತಃ ಹೊಣೆಗಾರರಾಗಿರುವುದು.

·         ಗೌರವ ಮತ್ತು ಸಮಾನತೆ: ಸಂಸ್ಥೆಯ ಪ್ರತಿಯೊಬ್ಬ ಸದಸ್ಯರನ್ನೂ (ಉದ್ಯೂಗಿಗಳು, ವಿದ್ಯಾರ್ಥಿಗಳು, ಗ್ರಾಹಕರು) ಗೌರವದಿಂದ ಕಾಣುವುದು ಮತ್ತು ಜಾತಿ, ಧರ್ಮ, ಲಿಂಗ ಭೇಧವಿಲ್ಲದೆ ಸಮಾನ ಅವಕಾಶ ನೀಡುವುದು.

·         ಶ್ರೇಷ್ಠತೆ: ಶಿಕ್ಷಣ, ಸೇವೆ ಅಥವಾ ಉತ್ಪಾದನೆಯಲ್ಲಿ ಉನ್ನತ ಗುಣಮಟ್ಟವನ್ನು ಕಾಯ್ದುಕೊಳ್ಳುವುದು ಹಾಗೂ ನಿರಂತರ ಪ್ರಗತಿಯತ್ತ ಶ್ರಮಿಸುವುದು.

·         ಸಹಯೋಗ ಮತ್ತು ತಂಡ ಕಾರ್ಯ: ಸಂಸ್ಥೆಯ ಸಾಮಾನ್ಯ ಗುರಿಗಳನ್ನು ತಲುಪಲು ಎಲ್ಲರೂ ಜೊತೆಗೂಡಿ, ಪರಸ್ಪರ ಸಹಕಾರದಿಂದ ಕೆಲಸ ಮಾಡುವುದು.

·         ಪಾರದರ್ಶಕತೆ: ಆಡಳಿತ, ನಿರ್ಧಾರ ತೆಗೆದುಕೊಳ್ಳುವ ಪ್ರಕ್ರಿಯೆ ಮತ್ತು ಸಂವಹನದಲ್ಲಿ ಸ್ಪಷ್ಟತೆ ಹಾಗೂ ಮುಕ್ತತೆ ಇರುವುದು.

·         ಸಾಮಾಜಿಕ ಹೊಣೆಗಾರಿಕೆ: ಪರಿಸರ ರಕ್ಷಣೆ, ಸಮುದಾಯದ ಏಳಿಗೆ ಮತ್ತು ಸಮಾಜದ ಹಿತದೃಷ್ಟಿಯಿಂದ ಕೆಲಸ ಮಾಡುವುದು.

·         ನಾವೀನ್ಯತೆ: ಹೊಸ ಆಲೋಚನೆಗಳು, ಸುಧಾರಿತ ತಂತ್ರಜ್ಞಾನ ಮತ್ತು ಸೃಜನಶೀಲ ಪರಿಹಾರಗಳನ್ನು ಪ್ರೋತ್ಸಾಹಿಸುವುದು.

·         ತಂಡದ ಕಾರ್ಯ: ಒಗ್ಗಟ್ಟು, ಸಹಕಾರ ಮತ್ತು ಪರಸ್ಪರ ನಂಬಿಕೆಯೊಂದಿಗೆ ಸಂಸ್ಥೆಯ ಗುರಿಗಳನ್ನು ಮುಟ್ಟುವುದು.

ಧಾರ್ಮಿಕ ಮೌಲ್ಯಗಳು

         ಧಾರ್ಮಿಕ ಮೌಲ್ಯಗಳು ವ್ಯಕ್ತಿಯ ಜೀವನವನ್ನು ಸರಿದಾರಿಯಲ್ಲಿ ನಡೆಸಲು, ಸಮಾಜದಲ್ಲಿ ಶಾಂತಿ, ಸೌಹಾರ್ದತೆ ಮತ್ತು ನೈತಿಕತೆಯನ್ನು ಕಾಪಾಡಲು ನೆರವಾಗುವ ಮೂಲಭೂತ ತತ್ವಗಳಾಗಿವೆ.

ಪ್ರಮುಖ ಧಾರ್ಮಿಕ ಮತ್ತು ನೈತಿಕ ಮೌಲ್ಯಗಳು,

·         ಸತ್ಯ: ಸದಾ ಸತ್ಯವನ್ನು ನುಡಿಯುವುದು ಮತ್ತು ಸತ್ಯದ ಹಾದಿಯಲ್ಲಿ ನಡೆಯುವುದು.

·         ಧರ್ಮ: ನ್ಯಾಯ, ಕರ್ತವ್ಯನಿಷ್ಠೆ ಮತ್ತು ಸತ್ಕಾರ್ಯಗಳ ಮಾರ್ಗದಲ್ಲಿ ಜೀವಿಸುವುದು.

·         ಅಹಿಂಸೆ: ಯಾವುದೇ ಜೀವಿಗೆ ಕಾಯಾ, ವಾಚಾ, ಮನಸಾ ಹಿಂಸೆ ನೀಡದಿರುವುದು ಮತ್ತು ಕರುಣೆ ತೋರುವುದು.

·         ಶಾಂತಿ: ಮನಸ್ಸಿನ ನೆಮ್ಮದಿ ಹಾಗೂ ಸಮಾಜದಲ್ಲಿ ಸಹಬಾಳ್ವೆಯನ್ನು ಕಾಪಾಡಿಕೊಳ್ಳುವುದು.

·         ದಯೆ ಮತ್ತು ಕರುಣೆ: ಸಂಕಷ್ಟದಲ್ಲಿರುವವರಿಗೆ ಸಹಾಯ ಮಾಡುವುದು. ಬಸವಣ್ಣ ನವರು ಹೇಳಿದಂತೆ “ದಯೆಯೇ ಧರ್ಮದ ಮೂಲವಯ್ಯ” ಎಂದು ಬದುಕುವುದು.

·         ಕಾಯಕ ಮತ್ತು ದಾಸೋಹ: ಪ್ರಾಮಾಣಿಕ ಶ್ರಮ ಮತ್ತು ಗಳಿಸಿದ ಸಂಪತ್ತಿನಲ್ಲಿ ಸಮಾಜಕ್ಕೆ ನಿಸ್ವಾರ್ಥ ಸೇವೆ/ದಾನ ಮಾಡುವುದು.

·         ಸಹನೆ ಮತ್ತು ಕ್ಷಮೆ: ಕೋಪವನ್ನು ನಿಯಂತ್ರಿಸಿ ಇತರರ ತಪ್ಪುಗಳನ್ನು ಕ್ಷಮಿಸುವ ಗುಣ.

·         ಭಕ್ತಿ ಮತ್ತು ಶ್ರದ್ಧೆ: ದೇವರಲ್ಲಿ ಹಾಗೂ ಧರ್ಮದಲ್ಲಿ ನಂಬಿಕೆ ಮತ್ತು ಶ್ರದ್ದೇಯನ್ನು ಹೊಂದುವುದು.